Job 14

1 ^a“Mwanadamu aliyezaliwa na mwanamke
siku zake ni chache nazo zimejaa taabu.

2 ^bHuchanua kama ua kisha hunyauka;
huwa kama kivuli kipitacho upesi, wala hadumu.

3 ^cJe, unamwekea jicho lako mtu kama huyo?
Je, utamleta mbele yako katika hukumu?

4 ^dNi nani awezaye kutoa kitu safi kutoka kitu najisi?
Hakuna awezaye!

5 ^eSiku za mwanadamu zimewekewa mpaka;
umekwisha kutangaza idadi ya miezi yake
na kuweka mpaka ambao hawezi kuuvuka.

6 ^fHivyo angalia mbali umwache,
hadi awe amekamilisha muda wake
kama mtu aliyeajiriwa.

7 ^g“Kwa maana lipo tumaini kwa mti;
kama ukikatwa utachipuka tena,
nayo machipukizi yake mapya hayatakoma.

8 ^hMizizi yake yaweza kuchakaa ardhini
na kisiki chake kufa udongoni,

9 ⁱlakini kwa kupata dalili ya maji utachipua
na kutoa machipukizi kama mche.

10 ^jLakini mwanadamu hufa, na huo ndio mwisho wake;
hutoa pumzi ya mwisho, naye hayuko tena!

11 ^kKama vile maji yatowekavyo katika bahari,
au mkondo wa mto ukaushwavyo na kuwa mkavu,

12 ^lndivyo mwanadamu alalavyo chini asiamke;
hadi mbingu zitakapokuwa hazipo tena,
wanadamu hawataamka au kuamshwa
kutoka kwenye usingizi wao.

13 ^m“Laiti kama ungenificha kaburini, ▼

▼ Kaburini hapa maana yake ni Kuzimu, kwa Kiebrania ni Sheol.

na kunisitiri hadi hasira yako ipite!
Laiti ungeniwekea wakati,
na kisha ukanikumbuka!

14 ^oJe, kama mtu akifa, aweza kuishi tena?
Siku zote za kazi zangu ngumu
nitangojea kufanywa upya kwangu.

15 ^pUtaniita nami nitakuitika;
utakionea shauku kiumbe ambacho mikono yako ilikiumba.

16 ^qHakika ndipo utakapozihesabu hatua zangu,
lakini hutazifuatia dhambi zangu.

17 ^rMakosa yangu yatafungiwa kwa lakiri kwenye mfuko,
nawe utazifunika dhambi zangu.

18 ^s“Lakini kama mlima umomonyokavyo na kufikichika
na kama vile mwamba uondolewavyo mahali pake,

19 ^tkama maji yamalizavyo mawe,
na mafuriko yachukuavyo udongo,
ndivyo unavyoharibu tegemeo la mwanadamu.

20 ^uHumshinda mara moja kwa daima, naye hutoweka;
waibadilisha sura yake na kumwondoa.

21 ^vKama wanawe wakipewa heshima, yeye hafahamu;
kama wakidharauliwa, yeye haoni.

22 ^wYeye hasikii kingine isipokuwa maumivu ya mwili wake mwenyewe,
naye huomboleza kwa ajili yake mwenyewe.”